An Kama Mutane Shida da Ake Zargi da Taimaka wa Masu Garkuwa da Ɗaliban Oyo, Har Yanzu Manyan ‘Yan Bindigar Na Cikin Daji

Wasu rahotanni da ke yawo sun nuna cewa jami’an tsaro a Jihar Oyo sun kama mutane shida da ake zargi da taimaka wa masu garkuwa da mutanen da suka sace dalibai a yankin Ahoro-Esiele da ke karamar hukumar Oriire.

Sai dai har zuwa yanzu babu wata sanarwa ta hukuma da ta tabbatar da cewa an kama manyan ‘yan bindigar da suka aikata satar mutanen, domin rahotannin tsaro na nuna cewa har yanzu suna ɓoye a cikin dazuka tare da kauce wa bibiyar jami’an tsaro.

Rahotannin sun bayyana cewa mutanen da aka kama ba su ne jagororin ƙungiyar masu garkuwa da mutanen ba, amma ana zarginsu da taka rawa wajen kai saƙonni, tattara kuɗaɗen fansa da kuma samar da bayanan sirri ga maharan.

Daga cikin waɗanda aka kama akwai Babangida Buhari Awalu da Kabiru Aliyu, waɗanda ake zargin suna achaɓa kuma suna taimakawa wajen karbar da isar da kuɗaɗen fansa ga masu garkuwa da mutanen.

Haka kuma an kama Adewuyi Sunday, Ayanwola Gbenga da Rafiu Abdulmajeed bayan ci gaba da binciken jami’an tsaro. Ana zargin sun taimaka wajen gudanar da wasu harkokin kungiyar.

Wani rahoto ya kuma ambaci Adeleye Ayomide, ɗalibi daga wata jami’a a yankin, wanda ake zargin an kama shi bayan an same shi da wayar ɗaya daga cikin waɗanda aka sace. Rahoton ya ce an gano wasu saƙonnin neman kuɗin fansa da aka aika wa iyayen waɗanda aka sace daga na’urarsa.

Majiyoyin tsaro sun ce bincike ya nuna cewa wasu masu ba da bayanai suna amfani da wayoyin hannu wajen jagorantar ‘yan bindigar kan hanyoyin shiga da fita daga dajin Old Oyo National Park domin gujewa jami’an tsaro.

Rahotannin sun kuma yi ikirarin cewa wasu kuɗaɗen fansa sun riƙa shiga wasu asusun bankuna kafin a rarraba su ga mambobin ƙungiyar. An ambaci wasu asusun da ake zargin an yi amfani da su wajen wannan aiki, yayin da ake cewa hukumomin yaƙi da cin hanci da rashawa da babban bankin ƙasa sun fara bincike tare da daskarar da wasu asusun da ake zargi.

Duk da haka, hukumomin tsaro ba su fitar da cikakken bayani a hukumance kan waɗannan zarge-zarge ba, kuma har yanzu ana ci gaba da gudanar da bincike domin gano gaskiyar lamarin da kuma kamo sauran waɗanda ake zargi da hannu a satar ɗaliban.