ICPC Ta Cigaba Da Tsare El-Rufai Bayan Kotu Ta Ɗage Zama

Wata Babbar Kotun Tarayya da ke zamanta a jihar Kaduna ta ɗage sauraron buƙatar beli na tsohon gwamnan jihar Kaduna, Nasir Ahmad El-Rufai, zuwa ranar 1 ga watan Afrilu, 2026, domin ci gaba da sauraron shari’ar da ake yi masa.

Abin da Ya Faru a Kotu

A zaman kotun da aka yi a ranar Talata, lauyoyin El-Rufai sun fara gabatar da wata buƙata cewa alkalin da ke sauraron shari’ar ya janye daga shari’ar, suna zargin son kai. Sai dai daga bisani sun janye wannan buƙata, wanda ya bai wa kotun damar ci gaba da shari’ar.

Sai dai kotun ba ta samu damar fara sauraron buƙatar belin ba, saboda masu gabatar da ƙara sun shigar da sabbin takardu da martani kan buƙatar belin a daidai lokacin zaman kotun. Wannan ne ya sa alkalin ya yanke shawarar ɗage shari’ar zuwa wata rana domin ba kowane ɓangare damar yin nazari kan takardun.

Bayan kammala zaman kotun, an mayar da El-Rufai zuwa hannun Hukumar Yaƙi da Rashin Ɗa'a da rashawa mai zaman kanta wato (ICPC), inda zai ci gaba da kasancewa a tsare har zuwa ranar da kotu ta sake zama.

Zarge-Zargen da Ake Masa

Ana tuhumar tsohon gwamnan da laifuffuka da dama da suka haɗa da:

Cin zarafin muƙami

Zamba da almundahana

Hada-hadar kuɗaɗe ba ta hanyar halal ba.

Bai wa wasu gata ba bisa ƙa’ida ba yayin da yake gwamna daga 2015 zuwa 2023

Muhimmancin Shari’ar

Wannan shari’a ta jawo hankalin jama’a a faɗin ƙasar nan, ganin cewa El-Rufai babban ɗan siyasa ne kuma tsohon gwamna. Masana harkokin siyasa na ganin yadda shari’ar za ta kaya na iya yin tasiri ga siyasar ƙasa, musamman yayin da ake tunkarar zaɓen shekarar 2027.