Sabon Sufeto Janar Na 'Yansanda Ya Kaddamar Da Kwamitin Kirkiro Da 'Yansandan Jihohi
Wannan mataki na daga cikin muhimman sauye-sauyen tsaro da sabon Sufeto Janar ɗin yake son kafa wa tun bayan tabbatar da nadin da Bola Ahmed Tinubu ya yi masa makonni biyu da suka gabata, bayan murabus ɗin tsohon Sufeton Janar, Kayode Egbetokun.
An nada Farfesa Olu Ogunsakin a matsayin shugaban kwamitin mutum takwas da aka ɗora wa alhakin:
Shirya tsarin aiki da dokoki na ‘yan sanda na jihohi;
Nazarin tsarin ƙasashe daban-daban domin zabar mafi dacewa da Najeriya;
Samar da tsarin kulawa da ladabtarwa domin tabbatar da mutunta haƙƙin jama’a;
Da Kuma yin muhawara da gwamnatocin jihohi da sauran masu ruwa da tsaki.
Kwamitin na da wa’adin wata ɗaya domin gabatar da cikakken taswirar yadda za a aiwatar da sabon tsarin.
A jawabin da ya gabatar yayin kaddamar da kwamitin, Disu ya ce jagoranci ba matsayi ba ne kawai, amma nauyi ne da ya kamata a ɗauke shi cikin gaskiya da adalci. Ya kara da cewa:
Rundunar ‘yan sanda dole ta gina martabar ta bisa mutunta haƙƙin ɗan Adam;
Sassan bincike kamar Public Complaint Unit da X-Squad za su yi aiki ba tare da tsoma bakin kowa ba;
Tsarin ‘yan sanda na jihohi zai taimaka wajen hanzarta martani ga matsalolin tsaro a ƙananan hukumomi.
Tsarin da ake shirin aiwatarwa zai ba jihohi damar:
Fuskantar matsalolin tsaro na yankunansu kai tsaye;
Rage dogaro ga rundunar tarayya a kan ƙananan laifuka;
Kafa ingantaccen tsarin tsaro na hadin gwiwa tsakanin jihohi da Abuja.
Sai dai masana harkokin tsaro na cewa, samun cikakkiyar nasarar wannan tsarin zai buƙaci daidaita dokokin tsarin mulki, tare da samun goyon bayan majalisun dokoki.
Kaddamar da wannan kwamitin na nuna cewa sabon Sufeto Janar Tunji Disu ya fara da muhimman matakan garan bawul, wanda zai iya sauya yanayin aikin ‘yan sanda a Najeriya idan aka aiwatar da su yadda ya dace.
Comments
Post a Comment