🔥 Rikicin Gabas ta Tsakiya: Majalisar Ɗinkin Duniya Ta Gargadi Amurka, Isra’ila da Iran

Shugaban Majalisar Ɗinkin Duniya, António Guterres, ya sake yin kira mai ƙarfi ga ƙasashen da ke rikici a yankin Gabas ta Tsakiya da su gaggauta kawo ƙarshen tashin hankalin da ke ƙara tsananta, yana mai gargadin cewa yaƙin na iya wuce gona da iri idan ba a dakatar da shi ba cikin gaggawa.

A jawabin da ya yi yayin wani taron manema labarai tare da Shugaban Majalisar Tarayyar Turai, António Costa, Guterres ya bayyana cewa lokaci ya yi da za a kawo ƙarshen wannan yaƙi da ke jefa fararen hula cikin mawuyacin hali.

Ya ce: “Lokaci ya yi da za a kawo ƙarshen wannan yaƙi da ke barazanar ƙazancewa, yana haddasa mummunar wahala ga fararen hula.”

Shugaban na Majalisar Ɗinkin Duniya ya yi wannan kira ne musamman ga ƙasashen Amurka da Isra'ila, inda ya buƙacesu da su rage tashin hankalin da ke ƙara ƙamari a yankin.

Haka kuma, Guterres ya yi kira ga ƙasar Iran da ta dakatar da kai hare-hare kan maƙwabtanta, yana mai cewa waɗannan ƙasashe ba su da hannu kai tsaye a rikicin.

Ya ƙara da cewa rufe mashigar jiragen ruwa ta Hormuz na tsawon lokaci yana haddasa babbar matsala ga al’ummar duniya baki ɗaya, musamman ma waɗanda ba su da alaƙa da rikicin.

Masana harkokin tsaro da tattalin arziƙi sun bayyana cewa ci gaba da rikicin da kuma rufe wannan mashiga mai muhimmanci na iya haifar da tashin farashin man fetur da kuma tangarda ga kasuwancin duniya.

A halin yanzu, Majalisar Ɗinkin Duniya na ci gaba da kira ga dukkan ɓangarorin da su zauna a teburin sulhu domin kauce wa faɗaɗa rikicin zuwa wani babban yaƙi da zai iya shafar duniya baki ɗaya.