“Ban Koma APC Ba!” — Gwamna Bala Mohammed Ya Ɓara

Gwamnan Jihar Bauchi, Bala Mohammed, ya fito karara ya karyata jita-jitar da ke yawo cewa zai sauya sheka daga jam’iyyar (PDP) zuwa (APC).

Rahotanni sun nuna cewa gwamnan ya bayyana hakan ne yayin da yake magana da manema labarai a Fadar Gwamnati da ke Bauchi, inda ya ce bai taɓa sanar da kowa cewa zai bar jam’iyyarsa ba. Ya ƙara da cewa jita-jitar da ake yaɗata ba ta da tushe, domin har yanzu yana nan daram a PDP. 

Gwamna Bala Mohammed, wanda shi ne shugaban ƙungiyar gwamnonin PDP a faɗin kasar, ya ce abin dariya ne yadda mutane ke yaɗa labarin cewa ya sauya sheƙa alhali bai yi wata sanarwa a hukumance ba. 

Ya bayyana cewa:

 “Ban motsa ba; sun ce na sauya sheka,”

inda ya nuna mamakinsa kan yadda labarin ya bazu a kafafen yaɗa labarai. 

Dalilin Yaɗuwar Jita-Jitar

A kwanakin baya ne aka fara raɗe-raɗin cewa gwamnan na shirin komawa APC, musamman bayan wasu sauye-sauyen siyasa da ake gani a wasu jihohi. Sai dai shi da kansa ya sake jaddada cewa zai ci gaba da zama a PDP, yana mai cewa matsalolin cikin jam’iyyar ana iya magance su. 

Har ila yau, gwamnan ya ce yawan tattaunawar da ake yi a kansa yana nuna irin muhimmancin da yake da shi a siyasar Najeriya, yana mai cewa hakan ya sa ya zama abin kallo a fagen siyasa. 

A yayin wannan jawabi, Gwamna Bala Mohammed ya buƙaci manyan jami’an gwamnati da ma’aikatan jiha su kasance masu gaskiya da riƙon amana, yana gargaɗin cewa gwamnatinsa ba za ta lamunci cin hanci ko rashin ɗa’a ba.