An yi Zargin Sojojin Sun Kashe Mutane Uku A Akwa Ibom, Mazauna Sun Koka Kan Cin Zarafi
An ce sojojin na aikin tsaron kamfanin ne domin kare ma’aikata da kadarorin kamfanin, sai dai wani rikici da ya ɓarke tsakanin jami’an tsaron da wasu matasa ya rikiɗe zuwa harbe-harbe, wanda ya yi sanadin mutuwar mutane uku da ake zargin ‘yan asalin yankin ne.
Mazauna yankin sun bayyana cewa wannan ba shi ne karo na farko da suke fuskantar cin zarafi daga jami’an tsaron da aka tura don kare kamfanin ba. Sun zargi sojojin da yawaita tsoratar da jama’a, cin zarafin matasa, da amfani da ƙarfi fiye da kima wajen magance saɓani
Wasu daga cikin mazauna sun ce zaman sojojin a yankin ya haifar da yanayi na tsoro da rashin kwanciyar hankali maimakon samar da tsaro ga al’umma.
Al’ummar yankin sun yi kira ga hukumomi da su gudanar da cikakken bincike kan lamarin domin gano musabbabin harbin da kuma hukunta duk wanda aka samu da laifi. Sun kuma buƙaci gwamnati ta sake duba yadda ake tura jami’an tsaro domin kare kamfanoni masu zaman kansu a yankunansu.
Rahotanni sun nuna cewa a baya ma an samu wasu zarge-zarge makamantan wannan a jihar Akwa Ibom, inda aka taɓa zargin wani soja da harbe wani yaro a yayin aikin tsaro a wani kamfani. Wannan ya ƙara dagula dangantaka tsakanin jami’an tsaro da al’ummar yankuna da kamfanoni ke aikin tsaron kamfanoni masu zaman kansu.
Har zuwa lokacin haɗa wannan rahoto, babu cikakken bayani daga rundunar Nigerian kan dalilin harbin, amma ana sa ran za a ƙaddamar da bincike domin gano gaskiyar abin da ya faru.
Lamarin ya ƙara jawo muhawara kan yadda jami’an tsaro ke gudanar da aiki a yankunan da kamfanoni masu zaman kansu ke aiki, musamman dangane da kare haƙƙin bil’adama da tabbatar da zaman lafiya tsakanin al’umma da hukumomi.
Comments
Post a Comment