Kasar Japan Ta Sake Kunna Babbar Tashar Nukiliyarta
Rahotanni sun bayyana cewa wannan mataki na daga cikin shirin gwamnatin Japan na ƙara hanyoyin samar da wutar lantarki tare da rage dogaro da makamashin mai da iskar gas da ake shigo da su daga ƙasashen waje. Hakan na zuwa ne a daidai lokacin da ake fuskantar hauhawar farashin makamashi a duniya.
An rufe tashoshin nukiliyar Japan baki ɗaya ne bayan girgizar ƙasa da ambaliyar ruwa (tsunami) da suka afku a arewa maso gabashin ƙasar, lamarin da ya haddasa mummunar matsala a tashar Fukushima Daiichi. Wannan ibtila'i ya haifar da fargaba a cikin al’umma game da tsaron amfani da makamashin nukiliya.
Sai dai hukumomin Kasar Japan sun ce an aiwatar da tsauraran matakan tsaro da sabbin ka’idoji kafin sake kunna wannan matattarar, domin tabbatar da kare rayuka da muhalli. Sun jaddada cewa an gudanar da bincike mai zurfi da gwaje-gwaje da dama kafin a ba da izinin sake fara aiki.
Masana harkar makamashi na ganin cewa sake kunna tashoshin nukiliya zai taimaka wa Japan wajen tabbatar da wadatar wutar lantarki da kuma cimma burin rage hayakin da ke gurbata muhalli. Duk da haka, wasu kungiyoyin fararen hula na ci gaba da nuna damuwa kan yiwuwar barazanar tsaro da illa ga muhalli.
Ana sa ran cewa wannan mataki zai haifar da muhawara mai zafi a cikin gida da kuma hankalin kasashen duniya, musamman ganin irin tasirin da bala’in Fukushima ya yi a tarihin amfani da makamashin nukiliya a Kasar Japan.
Comments
Post a Comment